پنجگور: زوربیگواھیں زھیر بلوچ ءِ جنک ءَ چہ پنجگور پریس کلب ءَ پریس کانپریس کرتگ ءُ گوشتگ که زور بیگواھیں درکانودی کارے ءُ رھبندانی بگیری اِنت که ریاستی اداره شپ ءَ بے جست ءَ گساں بیڑ بر اَنت چادر ءُ چار دیوالی لگتمال کن اَنت ءُ سرجمیں کھول ءَ زوراکیانی آماچ کن اَنت، آ گوں بے راھبندی ءَ مئے آزیزاں داں بازیں سالاں زور بیگواه کن اَنت که اِے پاکستان ءِ وتی رھبندانی بگیری اِنت.
آئی ءَ گوشتگ که مئے پت 13 اپریل 2015 ءَ ریاستی ادارهاں چه ھب چوکی ءَ بیگواه کرتگ ، مرچی آئی ءِ زوریں بیگواھی ءَ ده سال سرجم اِنت ءُ مارا آئی ءِ بابت ءَ ھچ وڑیں سرپدی نیست. اے دھیں سالاں ما کانودی کارانی بنیاد ءَ ھب ءُ پنجگور ءَ زھرشانی کرتگ، شال ءَ وتی کیس برتگ ءُ داں اسلام آباد ءَ پہ وتی پت ءِ زوریں بیگواھی ءِ بگیری ءَ توار چست کرتگ بلے ده سال ءِ گوزگ ءَ پد ھم آئی ءِ ھچ وڑیں ھال نیست.
آئی ءَ گوشتگ اِے دھیں سالاں ما وتی زندگی گوں جنجالاں گوازینتگ۔ زوریں بیگواھی یک درانسانی ءُ دردناکیں کارے که چه ایشی ءَ بس یک مردمے بیگواه نه بیت بلکیں گوں آئی ءِ بیگواھی ءَ ھوار درسیں وشی، آئی ءِ پجار ءُ گوستگیں درسیں وشیں وھد ھم بیگواه بنت بس یک دراجکش ءُ بے آسریں گم ءُ جنجالے ءِ درد ءُ رنج ءِ مارشت پشت کپ اَنت۔ مئے ائید په ما ائید نه اَنت بلکیں اے وشیانی روچ مئے گم ءَ گیش کن اَنت، وھدے که ما آدگه مردمانی وشیانی گند اِیں ما ھمے جیڑ ایں کہ مئے مردم مئے گون ءَ ھوار بوتین اَنت۔ مئے پت مئے وشیانی چراگ بیتگ که ریاست ءَ بیگواہ کرتگ ءُ نوں ما گوں انچیں جاورے ءَ دیم پہ دیم ایں نہ زانیں باریں زندگ اِنت یا کشگ بوتگ۔
کھول ءِ گوشگ اِنت که چوش که مئے پت ءِ دراجکشیں زوریں بیگواھی ءَ 13 اپریل 2025 ءَ ده سال سرجم بیت ما چه اے پریس کانپرس ءِ پارست ءَ گوش اِیں که ھمے درگت ءَ وتی پت ءِ زوریں بیگواھی ءِ بگیری ءَ 13 اپریل 2025 ءَ دیوانے برجم دار ایں ءُ دیوان ءِ وھد ءُ جاگه ءَ دیمتر ءَ گوش اِیں۔
