آواران: نوندڑہ ءِ میتگ کُچ ءَ پاکستانی لشکر ءِ نیمگ ءَ میتگ ءِ تہ ءَ بنجل جنگ ءُ نندگ ءِ سوب ءَ مردماں وتی گِس ءُ جاگھ یل داتگ اَنت ءُ لڈ ءُ بار کرتگ ءُ آدگہ میتگاں شتگ اَنت۔
ھندی بنشون ءِ رد ءَ پاکستانی لشکر ءَ دہ روچ ءَ گیش اِنت کہ کچ ءِ میتگ ءَ نشتگ۔ مردماں گوں لشکر ءَ لوٹ کرتگ کہ آ وتی بنجل ءَ چہ میتگ ءَ گستا بہ کنت بلے آئی مردمانی گپ گوش نہ داشتگ ءُ پہ زور نشتگ۔
ھبدہ اپریل ءَ مردماں لشکر ءِ زوراکیانی بگیری ءَ زھرشانی ءَ آواران لسبیلہ دگ بند کرتگ۔ چہ انتزامیہ ءِ دلجمی دیگ ءَ آیاں وتی زھرشانی ھلاس کرتگ۔
آئی ءِ گوشگ اِنت کہ ھندی انتزامیہ ءَ چہ میتگ ءَ پاکستانی لشکر ءِ درکنگ ءِ بگیری ءَ گامگیج زورگ ءَ ابید زھرشانی کنوکیں مردمانی بگیری ءَ ایپ آئی آر کرتگ کہ شما زھرشانی کرتگ ءُ دگ بند کرتگ۔
آئی ءِ گوشگ اِنت کہ مئے میتگ ءَ پنجاہ ءَ گیش مردماں وتی گس ءُ جاگھ یل داتگ اَنت ءُ لڈ ءُ بار کرتگ۔
ھندی مردماں گوں وتگڑیں سرکار ءَ لوٹ کرتگ کہ چہ میتگ ءِ تہ ءَ پاکستانی لشکر ءِ کشگ ءَ گامگیج بہ زور ایت ءُ گوں میتگ ءِ مردماں انساپ بہ کنت۔
