تربت: 25 مئی 2025 ءَ پاکستانی پوج ءِ دست ءَ زور بیگواہ کنگ بیتگیں جیھند بلوچ ءِ گھار سمرین بلوچ ءَ وتی تامربندے شنگ کرتگ ءُ پہ جیھند بلوچ ءِ آجوئی ءَ توار چست کنگ ءِ لوٹ کرتگ۔
آئی ءَ گوشتگ کہ منی برات 25 مئی 2025 ءَ پاکستانی پوج ءَ چہ گس ءَ تربت، بگ میری ءَ آوار جتگ۔ جیھند بلوچ تربت یونیورسٹی ءِ نودربرے ءُ بے میار اِنت اگان آئی سر ءَ چونیں بھتامے ھست گڑا آمیدگس ءَ پیش کنگ بہ بیت۔ انچوش کہ پاکستان ءِ راھبند ھمے چیز ءِ مانزمانی ءَ دنت که اگاں چونیں مردمے به بیت دزگیری ءَ پد داں بیست ءُ چار اداراں آمیدگس ءَ پیش کنگ بہ بیت۔
آئی ءَ گوشتگ کہ ھینچو روچ ءِ گوزگ ءَ پد مارا ھچ وڑیں سرپدی دیگ نہ بیتگ کہ جیھند بلوچ کج ءَ اِنت۔ مئے سرجمیں کھول جنجلانی دیمپان اِنت۔ ما ھمک روچ ھمے اوست ءَ داراں کہ جیھند آجو بیت انگت ءَ آئی ھچ وڑیں ھال نیست۔
سمرین بلوچ ءَ گوں سرکار، انسانی ھکانی گل ءُ گوں بلوچستان ءِ لس مردماں لوٹ کرتگ کہ پہ جیھند بلوچ ءِ آجوئی ءَ توار چست کنگ ءَ مئے کمک ءَ بہ کن اَنت دانکہ جیھند بلوچ آجو بہ بیت۔
آئی ءَ گوشتگ کہ ما باندا شپ ھپت ءَ داں دوازدہ ءَ کمپینے برجم دارگ ءَ ایں گوں درسیں بھرگاں سیادی داروکیں مردماں لوٹ کن ایں کہ آ کمپین ءَ بھر بزور اَنت۔ #ReleaseJeeyandLiaquat ھیش ٹیگ ءَ کارمرز بہ کن اَنت۔
