بلوچ وومن پورم ءِ چارمی بُنجاھی دیوان، بُنجاھی آرگنائزر ڈاکٹر شلی بلوچ ءِ سروکی ءَ برجم دارگ بوتگ۔ دیوان ءِ بن گپ کارگشاد ءِ رپورٹ، نگد کاری ، گل کاری ، ھندی ءُ میان استمانی سْیاسی جاور ءُ آؤکیں گامگیج بوتگ اَنت۔ دیوان ءِ بندات ءَ ڈپٹی آرگنائزر ءَ بنجاھی شش ماھی رپورٹ گوں دلجمی ءَ ونتگ ءُ رپورٹ ءِ سر ءَ دلجمی ءَ گپ ءُ باوست بوتگ-
آئی گوشتگ کہ بازیں گپ ءُ باوست ءَ پد دیمتر ءَ سنگتاں نگدی بنیاد ءَ تران کرتگ ءُ گوشتگ کہ گل ءِ کارانی تہ ءَ چی نزوری ھست ءُ کجام ھساب ءَ کار گوں جْوانتریں دروشمے ءَ دیم ءَ جُنزینگ بہ بنت- چوناھا کار ھما وھد ءَ گھتر بنت وھدیکہ کارانی سرا نگدی چمشانکے دیگ بہ بیت ءُ زمینی راستی ءَ شوربندی ٹھینگ بہ بنت۔ بلوچ یک انچیں سر ڈگارے ءِ واھُند اَنت کہ آ زمین ایر دست اِنت ءُ ایردستیں زمین ءِ سر ءَ وڑ وڑیں جیڑہ سر کش ایت- انوں ما بہ چاریں بلوچ ءِ زمین پہ بلوچ ءَ تنگ کنگ بیتگ بلے یک چیزے زانگی اِنت کہ یک ایر دستیں راجے ءِ تہ ءَ جیڑہ بنت بلے جیڑھانی میان ءَ ھما بلوچ گل کہ چونیں شوربندی ٹھین اَنت ءُ وتی لیڈر شپ ءَ ھوار ھر ھما باسک ءِ پھریزگ ءِ جھد ءَ کن اَنت آ گیش ارزشت دار اَنت- جاور ھر وھد ءَ یک ھساب ءَ نہ اوشت اَنت-
آئی گوشتگ کہ بلوچ زرمبشت ءِ تہ ءَ درستاں چہ گرانتریں ڈیوریشن 2009-2014 اَت- اے ھما وھد اَت کہ بلوچ زرمبشت ءِ سر ءَ مزنیں بندشے جنگ بیت بازیں گل ءِ لیڈرشپ ءُ باسک جنگ بنت گڑا گل پرشت ءُ پروش ءِ آماچ بنت۔ بلے کسانیں مدتے ءَ پد وتارا چہ کریک ڈاؤن ءَ کشگ ءُ ری سٹبلائیزیشن ءِ نیمگ ءَ بر اَنت ءُ مزنیں وھدے ءَ پد بازیں گل وتارا مھکم کنت ءُ بازیں انگت وتارا مھکم کنگ ءِ جھد ءَ اِنت- بلئے اے میان ءَ درستاں چہ شوکتریں چیز ایش بوتگ کہ لیڈرشپ ءِ جنگ ءَ ابید ھم گل اوشت ءِ آماچ نہ بوتگ اَنت بلکیں کجام وڑا وتارا مھکم کنگ ءِ جھد ءَ بیتگ اَنت گڑا استیں جاورانی تہ ءَ مارا اوشت ءِ آماچ بوگی نہ اِنت بلکیں وتی پالیسی مٹ کنگی اَنت ءُ جنزگی اِنت- سوب ھما وھد ءَ بلوچ ءِ بیت کہ اے جاورانی تہ ءَ وتی گل ءِ کارانی سر ءَ گیش دلگوش کنگ بہ بیت، وتی باسکانی تربیت کنگ ءُ آیانی پھریزگ اِنت، گڑا استان مزنیں کساسے ءَ بے سوب بیت ءُ بلوچ سوبمند بیت۔
آئی گوشتگ کہ استان ءَ کدی وتی پالیسی مٹ نہ کرتگ اَنت بلکیں بلوچ ءِ چُکچینی یکشل ءَ برجاہ اِنت بس جنگ ءُ کُشگ ءِ دروشم مٹ اَنت- زی کِل اینڈ ڈمپ پالیسی بیتگ مرچی ھم اے پالیسی جنزگ ءَ اِنت: ددوگیں میڑ (فیک انکاؤنٹر) ءِ دروشم ءَ، کشندہ ٹولی ھمینچو تاکت دیگ بوتگ اَنت کہ ھر کجا بلوچے بیگواہ کن اَنت، آئی ءِ جون روڑ ءِ لمب ءَ دور دیگ بیت- ایشی ھچ جست گرگ نہ بیت-
آئی گوشتگ کہ مکُران داں جھالاوان، سراوان ءُ داں کوہ ءِ سُلیمان ءَ، بلوچ اوبادگانی تیر سُپتگیں کنٹ بلوچ راج ءَ را سوگات کنگ بوگ ءَ اَنت، کشندہ ٹولی ھمینچو تاگت دیگ بیتگ کہ بلوچ ءِ جنک ءَ زورانسری گوں وت بارت ءُ جنک ءِ رزا ءُ منشا ءَ ابید آئی گوما آروس کنت- بلوچستان ءِ تہ ءَ اے وڑیں ویل باز بیتگ کہ لوگ ءِ تہ ءَ دور کنگ زالبول جنگ یا بلیک میل کنگ بوتگ اَنت۔
آئی گوشتگ کہ اسما بلوچ کہ ریاست ءِ داشتگیں کشندہ ٹولی ءِ دست ءَ بیگواہ کنگ بوت ءُ آئی ءِ کھول ءَ توکل کت ءُ دگ بست اَنت، توار چست کت آ پدا آجو بوت- بلوچستان ءِ تہ ءَ اے وڑیں بازیں کیس ھست بلے بازیں جاہ آسراتی نہ بوگ ءِ سوب ءَ مارا ھال سر نہ بنت یا کہ کھول ترسینگ بنت آ گپ نہ کن اَنت- آواران ءَ چہ لشکر ءِ تیرگواری ءَ ھوری نامیں جنینے شھید بیت ءُ دادی نامین ئے ٹپی بیت ، ماہ جبین بلوچستان شاھدر برجاہ ءِ نودربرے کہ آ شال ءَ زورانسری گار ءُ بیگواہ کنگ بیت ءُ مارچ ءِ ماہ ءَ بی وائی سی ءِ بنجاھی سنگت ڈاکٹر ماہ رنگ بلوچ، سبگت اللہ شاہ جی، بیبگر بلوچ ءُ بی وائی سی باسک گل زادی ءُ بیبو بلوچ زندانی کنگ بنت کہ سئے ماہ گوستگ انگت آ وڑ وڑیں بھتامانی دیمپان ءُ بندیگ اَنت، ریاست کدی ھم ترا مرد ءُ جنین ءِ بنیاد نہ جنت ءُ گار ءُ بیگواہ نہ کنت بلکیں آ ترا بلوچ کنت ءُ بیگواہ کنت ترا تئی پجار ءِ بنیاد ءَ جنت ءُ دور دنت، ھر ھما مردم ءِ تہ زانت بیت یا کہ آ مردینے یا زالبولے ریاست آئی ءَ یکیں نز ءَ چار ایت، وھدیکہ ریاست پہ بلوچ زالبول ءُ مردین ءِ میان ءَ تپاوت نہ کنت گڑا ما پرچا بہ کن ایں؟ بلوچ زالبول ھم بلوچ جھد ءَ ھوار بہ بنت ءُ وتی کرد ءَ پیلو بہ کن اَنت۔
آئی گوشتگ کہ آؤکیں گام گیج ءِ تہ ءَ جتائیں پیسلہ زورگ بوتگ- آیانی تہ ءَ پہ سنگتانی تربیت ءِ گیش کنگ ءَ ورکشاپ اڈ دیگ بیت ءُ پہ سنگتانی تربیت ءَ جتا جتائیں سْیاسی سرھالانی سر ءَ نبشتانک نبشتہ کنگ بیت ءُ کسانیں کتابک چاپ کنگ بیت، بلوچ ءِ گراؤنڈ ءِ سر ءَاے وھد ءَ بازیں جیڑہ جنزگ ءَ اَنت، بلوچ زالبولانی آوار جنی ءُ جنگ ءُ کشگ، دروگیں میڑ (فیک انکاؤنٹر)، ٹارگٹ کلنگ ،گار ءُ بیگواھی ءُ دگہ بازیں جیڑھانی سر ءَ یک روچی ئیں کانپرنسے ایر کنگ بیت۔ بنجاھی سنگتانی شور ءُ سلاہ ءَ پد، سامیہ بلوچ بنجاھی پتر ءِ باسک زورگ بوتگ، بلوچستان ءِ ھما ھند کہ انگت ما اود ءَ سر نہ بوتگ ایں، زوت ءَ چہ زوت بلوچستان ءِ ھما میتگاں وتارا سر کنگ ءِ جھد ءَ کن ایں دانکہ بلوچ زالبول جوانیں وڑے ءَ وتی کرد ءَ بلوچ جھد ءِ تہ ءَ پیلو بہ کنت۔ درستیں بن گپانی سر ءَ گوں دلجمی ءَ گپ ءُ باوست ءَ پد دیوان ءِ ھلاسی ءِ جار جنگ بوت۔
