بلوچ نیشنل موومنٹ ءَ پہ یورپی یونین ءِ جی ایس پلس ( جنرلائزڈ اسکیم آف پریفرنسز پلس ) ءِ درگت ءَ یک کمیٹی یے ٹھینتگ۔ ایشی مول بلوچستان ءَ انسانی ھکانی بگیریاں نبشتھی دروشم ءَ یورپی یونین ءِ ھمے ادارھاں پہ وھد سرپد بہ کنت۔
اے بابت ءَ پارٹی ءِ سرکماش ڈاکٹر نسیم بلوچ ءَ گوشتگ کہ اے کمیٹی ھمک روچ ءِ بنیاد ءَ زوریں بیگواھی، درکانودی کوش، آزار جاہ، سیاسی آجوئی ءِ سر ءَ بندش ءُ آدگہ ٹوھیں انسانی ھکانی لگتمالیانی رپورٹاں یکجاہ کنگ ءَ اِنت دانکہ یورپی یونین ءِ سرکار ءَ اے راستی تچک ءَ سرکنگ بہ بنت کہ آ چہ پاکستانی رسانکدر ءُ ریاستی ادارھانی زوراکیانی سوب ءَ دیم ءَ آھگ ءَ نہ اَنت۔
آئی ءَ گوشتگ کہ ما سرپد بہ ایں کہ اے وڑیں جاوراں پاکستان ءِ مالی یا سپارتی رد ءَ کمک کنگ ھاس پہ جی ایس پی پلس ءِ وڑیں تجارتی لبانی رد ءَ بلوچ راج ءِ بگیری ءَ برجاھیں انسانی ھکانی ناھکیں لگتمالی پلہ مرزی زانگ بیت۔
آئی ءَ گوشتگ کہ ما یورپی جمھوری، انسانی واک ءُ میان استمانی انساپ ءِ سر ءَ سدکیں۔ ھمے بنیادانی سر ءَ ما ھمے اوست ءَ دار ایں کہ یورپی یونین ھمیشی بنیاد ءَ ھم انسانی ھک ءُ انساپ ءَ سر ءَ اِنت ، اے وڑیں کارانی بھر نہ بیت کہ آ یک نزوریں راجے ءِ چکچینی ءَ کمک بہ کنت۔
یورپی یونین بلوچانی ھونانی نھاد ءِ سر ءَ پاکستان ءِ مالی کمک ءِ سر ءَ بہ چار ایت۔ پاکستان ھمے درسیں راھبندانی تچک ءَ بگیری ءَ کنت کہ ھمیشی بنیاد ءَ یورپی یونین چونیں ھم ڈیھے ءَ جی پی پلس ءِ ھمے اسکیم ءِ کابل سرپد بیت۔چہ ایشی آسر ءَ ھمک سال ءَ پاکستان ءَ شش ءُ ھپت ارب یورو ءِ کار ءُ بار ءَ نپ رسگءَ اِنت، اے تچک ءَ پاکستانی پوج ءَ گیشتر کمک کنگ ءِ سوب جوڑ بیت کہ آ بلوچستانءَ ریاستی ناشرکاری، زوریں بیگواھی، درکانودی کوش ءُ مچی مانشانی وڑیں زوراکی کنت۔
آئی ءَ گوشتگ کہ ھمیشی رد ءَ پاکستان ءَ 27 میان استمانی بنیادی کنویشنز ( بزاں انسانی ھک، مزدورانی ھک، ماھولیانی پھازداری ءُ گڈگورننس یا شریں سرکای ) ءِ سرجم ءَ پاسداری کنگ لوٹ ایت۔ یورپی یونین پہ جی پی ایس پلس اسکیم ءَ ھمے میان استمانی کنویزنشز ءِ پابندی ءَ ھژدری لیک ایت، ایشانی تہ ءَ انسانی ھکانی بنیادی جُز ھوار اِنت۔ بلے پاکستان ریاست بلوچستانءَ ھمے میان استمانی بنیادی راھبندانی یکشل ءَ بگیری ءَ کنگ ءَ اِنت۔ گڈ گورنرننس ءِ ھمے ھال اِنت کہ بلوچستانءَ پارلیمانی ٹولی ھم چہ آئی ایس آئی ءُ پوج ءِ رد ءَ پوسٹ گرگ ءَ اَنت۔
آئی ءَ گوشتگ کہ پاکستانی پوج ءُ آئی چیریں ادارہ بلوچ سیاسی کارکن ، نودربر، اھوالکار ءُ لس مردماں درکانودی آوار جنگ آزار دیگ یا درکانودی کشگ ءَ اَنت، اے کار میان استمانی شھری ءُ سیاسی ھکانی کول ( (ICCPR ءُ آزار دھی ءِ بگیری ءَ کنویشن ( (CAT ءِ تچک ءَ بگیری اِنت۔ ایشی پابندی GSP اسکیم ءِ بنیادی لوٹ اَنت۔ بلوچستان ءَ اھوالکار ھم آجو نہ اَنت کجام اھوالکار یا کارکن انسانی ھکانی بگیری ءِ ھال ءَ دنت آوار جنگ یا کشگ بیت۔
ڈاکٹر نسیم بلوچ ءَ گوشتگ کہ ما یکشل ءَیورپی یونین ءِ نوک گچین بیتگں جھگیر ءُ جتائیں ادارھاں اے ناھکیں انسانی تباھی ءِ بابت ءَ سرپد کنگ ءَ ایں ءُ ھمے لوٹ ءَ کنگ ءَ ایں کہ آ پاکستان ریاست ءِ اے درسیں سول ءُ لشکری اگدہ داراں جست بہ کنت کہ آ بلوچ چکچیی ءَ ھواراَنت۔ ما گوں یورپی یونینءَ ھمے لوٹ ءَ کن ایں کہ انسانی ھکانی ناھیں بگیریانی ھواریں ریاست ءِھر پیمیں سیاسی، لٹ ءُ پلی ءُ لشکری کمک ءِ سر ءَ بہ چار ایت ءُ آئی ھلاس بہ کنت۔
