اسلام آباد ءَ بی وائی سی ءِ سروک ءُ زور بیگواھیں مردمانی کھولانی نیمگ ءَ برجاھیں زھرشانی ءِ نوزدھمی روچ ءَ کھولاں پریس کانپریس کرتگءُ گوشتگ کہ زی ڈاکٹر ماہ رنگ بلوچ ءُ آدگہ سروک ناشرکاری ءِ گِر ءُ داریں آمیدگس ءَ پیش کنگ بیتگ اَنت، چہ پولیس ءِ نیمگ ءَ ھچ وڑیں منانک نہ بوگ ءَ ابید یکشل ءَ آیانی ریمانڈ گیش کنگ بوگ ءَ اَنت۔ مئے کانودی ٹولی ءَ آمیدگس ءَ ھمے گپ پیش کرتگ کہ ناشرکاری ءِ گر ءُ دار ایکٹ ( ATA) ءِ رد ءَ داں چاردہ روچ ءَ ریمانڈ ءِ چاردہ روچ ءَ گیش کنگ پکائیں منانکانی بنیاد ءَ بیت، بلے آبنیادی کانودی راھبنداں میان نیارگ ءَ اَنت بندات ءَ دہ، پد ءَ پانزدہ ءُ نوں دگہ بیست روچ ریمانڈ دیگ ءَ اَنت۔
آئی ءَ گوشتگ کہ بلوچستان آمیدگس انساپ ءَ ابید ریاستی زور ءُ پندلانی چیردست گندگ بوگ ءَ اَنت۔ نوں راھبنداں لگتمال کنگ ءُ زوراکی ءِ نزام ءِ میار ءَ ھوار بیتگ۔ آمیدگس ءِکارراھبند ءِ پھریزگءُ انساپ دیگ اِنت، بلے بلوچستان ءِ آمیدگس نوک آبادکاریں سسا ءِ رد ءَ پیسلہ کنگ ءَ اِنت۔
آئی ءَ گوشتگ کہ مئے پریس کانپریس ءِ دومی گپ اسلام آباد ءِ شھریانی بابت ءَ اِنت کہ آ چہ مئے زھرشانی ءَ سکا جنجالانی دیمپان اَنت۔ ما چہ شما اھوالکارانی پارست ءَ وتی کلوہ ءَ داں اسلام آباد ءِ شھریاں سر کنگ لوٹ ایں کہ چہ مئے زھرشانی ءِ سوب ءَ دگ بند اَنت ءُ مھلوک جنجال اِنت ایشی زمہ وار ما نہ ایں بلکیں سرکار، پولیس ءُ انتزامیہ اِنت۔ ما اسلام آباد ءَ اتکگ ایں گوں پر ایمنیءَ پریس کلب ءِ دیم ءَ زھرشانی کنگ لوٹ اتگ، بلے مارا موکل دیگ نہ بیتگ ءُ درسیں دگ بند کنگ بیتگ اَنت۔
آئی ءَ گوشتگ کہ ما اے گپ ءَ تچک کنگ لوٹ ایں کہ اسلام آباد انتزامیہ سرجم ءَ مئے سر ءَبندش جنگ لوٹ ایت۔ اسلام آباد پریس کلب ءِ درسیں دگ بند کنگ بیتگ اَنت ءُ مارا وڑ وڑیں آزار دیگ ءَ اَنت، پد ءَ ھم ما پر ایمن این ءُ دیم ءُ ھم بہ بہ ایں۔ ماشمے درسانی دیمءَ گوں اسلام آباد انتزامیہ ءَ لوٹ کن ایں کہ مارا پریس کلب ءِ دیم ءَ زھرشانی کنگ ءُ گدان جنگ ءِ موکل دیگ بہ بیت دانکہ راہ بند مہ بنت ءُ مردم جنجال مہ بنت۔
آئی ءَ گوشتگ کہ ماگوں درسیں سیاسی ٹولی ءُ سول سوسائٹی ءَ لوٹ کن ایں کہ آ چہ وتی زاتی ءُ پارٹیانی نپاں ابید مئے گون ءَ ھمتوار بہ بنت۔ بلوچ یکجھتی کمیٹی ءِ سروکانی دزگیری ءُ زوریں بیگواھی تھنا یک کھولے یا ٹولی یے ءِ جیڑہ نہ اِنت بلکیں پہ انسانیتءَ ٹوھیں تاوانے۔ مرچی اے زوراکی مئے سرءَ بوگ ءَ اِنت باندا اے دگرے ءِ گس ءَ سر بوت کنت۔
آئی ءَ گوشتگ کہ ما ریاست، سرکار ءُ واکداریں توانمنداں گوشگ لوٹ ایں دانکہ بی وائی سی ءِ سروک یل کنگ نہ بیتگ اَنت ما وتی زھرشانی ءَ برجاہ دار ایں۔ ما پہ وتی آزیزاں گھگیری کن ایں، پہ انساپ ءَ جھد کن ایں،اگاں درکار بہ بیت ما وتی زھرشانی ءَ گیش کن ایں۔ مارا مہ چکاس ات مئے ارادہ نزور نہ اِنت۔ ما وتی گھگیری ءَ داں پہ وتی آزیزانی آجوئیءَ برجاہ دار ایں۔
