اسلام آباد ءَ برجاھیں زھرشانی نندانک ءَ چل ءُ سے روچ سرجم بیتگ کہ انگت ءَ برجاہ اِنت۔ بی وائی سی ءِ سروک سمی دین ءَ ھوار زور بیگواھیں مردمانی کھول بازیں کچے ءَ زھرشانی نندانک ءَ نشتگ اَنت۔
چو مدامی وڑ ءَ مرچی ھم پہ سانمندیں کھولانی ھمدردری درشان کنگ ءَ سیاسی ءُ انسانی ھکانی کارکناں ابید جتائیں بھرگاں سیادی داروکیں مردم آتکگ اَنت۔
چہ زھرشانی نندانک ءَ انسانی ھکانی کارکن سپدر چودری ءُ تاھرہ ابداللہ ءَ تران کرتگ ءُ گوشتگ کہ انچو روچ اِنت اد ءَ اسلام آباد پریس کلب ءِ دیم ءَ برجاھیں زھرشانی ءَ کسانیں زھگ ءُ پیرزال پہ وتی بیگواھیں آزیزانی آجوئی ءَ نشتگ اَنت بلے انگت ءَ چہ سرکار ءِ نیمگ ءَ پہ آیانی لوٹانی گوشدارگ ءَ کس نہ یتکگ۔
آیاں لوٹ کرتگ ءُ گوشتگ کہ سرکاری جھگیر زھرشانی نندانک ءَ بیا اَنت ءُ اد ءَ نشتگیں مردمانی گپاں گوش بدار اَنت۔ دانکہ ایشانی گپ گوش دارگ نہ بیتگ اَنت جیڑہ گیش ءُ گیوار نہ بیت۔
آیاں گوشتگ کہ ھما مردم اپوزیشن ءَ بنت گڑا کاینت ءُ گوں زھرشانی کنوکیں کھولاں ھمدردی کن اَنت، وھدے کہ آ واکدار بنت گڑا وتی کرتگیں کولاں بے ھال کن اَنت۔ بلکیں گوستگیں بیست ءُ پنچ سال بیتگ کہ اپوزیشن ءِ مردم ھمے وڑ کنگ ءَ اَنت۔
آیاں گوشتگ کہ ھما مردم پیسر ءَ اپوزیشن ءَ بیتگ اَنت آیاں گوں بیگواھیں مردمانی کھولاں ھمدردی درشان کرتگ ءُ مرچی واکدار اَنت گڑا ھمے گپ ءَ گوش اَنت اے ناشرکار اَنت۔
