بلوچ یکجھتی کمیٹیءِ جارکش ءَ وتی شنگ کرتگیں درشانے ءَ گوشتگ کہ دوشی ھشت ءَ گولیمار چاراہ شال ءَ پاکستانی چیریں ادارہ، سی ٹی ڈی ءُ پولیس ءِ ھواریں کاروائی یے ءِ میان ءَ گل ءِ سرگرمیں کارکن نزر مری آوار جنگ ءُ بیگواہ کنگ بیتگ۔
آئی ءَ گوشتگ کہ نزر مری یک ورنائیں سیاسی کارکنے کہ چہ چنچو سالاں بلوچستان ءَ انسانی ھکانی پادمالی ءُ بلوچ چکچینی ءِ بگیری ءَ توار چست کنگ ءَ اِنت۔ اے وڑیں کارکنانی زوریں بیگواھی ریاستی ترس ءَ پیش دار ایت کہ آ پرر ایمنیں سیاسی توارانی دارگ ءِدرچ اِنت۔
آئی ءَ گوشتگ کہ پاکستان ریاست زور ءُ آزاردھی ءَ چو سلاہ ءِ وڑ ءَ کارمرز کنگ ءَ اِنت، بلے گوستانک گواہ اِنت کہ اے وڑیں پالیسی گڈسر ءَ ریاستانی پروش ءِ سوب جوڑ بیتگ اَنت۔
جارکش ءَ گوشتگ کہ گوستگیں شش ماھانی میان ءَ زوریں بیگواھی، سیاسی کارکنانی دزگیری، مچی سزا ءُ درکانودی کوش گیش بیتگ اَنت۔
آئی ءَ گوں انسانی ھکانی گل، رسانکدر ءُ میان استمانی تک ءَ لوٹ کرتگ کہ آ پہ نزر مری ءِ آجوئی ءُ بلوچستان ءَ برجاھیں انسانی ھکانی لگتمالیانی سر ءَ زوت دلگوش بدے اَنت۔
