اسلام آباد: زوربیگواھیں مردم ءُ بی وائی سی ءِ سروکانی کھولانی نیمگ ءَ برجاھیں زھرشانی ءَ مرچی چل ءُ ھشت روچ بیتگ که برجاه اِنت ، زھرشانی کنوکاں مرچی ھم روانکے کش اِتگ ءُ بی وائی سی ءِ سروکاں ھوار زوربیگواھیں مردمانی یل کنگ ءِ لوٹ کرتگ۔
زھرشانی کنوکاں گوشتگ که اے چل ءُ ھشتیں روچ انچائیں روچ نه اَنت بلکیں چل ءُ ھشت ٹپ اَنت که کھولانی دل ءَ لگگ ءَ اَنت ، اسلام آباد ءِ دگانی سر ءَ نشتگیں مات ءُ گھار تھنا په وتی آزیزاں توار چست کنگ ءَ نہ اَنت بلکیں ھمے کول ءَ کنگ اَنت که دانکه گڈی زوربیگواھیں مردم واتر نه بیت ما وتی جھد ءَ برجاہ دار ایں۔
آیاں گوشتگ که ریاست ءِ سنگدلی ، سرکار ءِ بے پروائی ءُ رسانکدر ءِ اِے بے تواری اَلّم گوستانک ءِ ته ءَ یاد کنگ بنت ، بلے اے کھولانی دیم ءَ درآھگ ءُ جھد په آھوکیں پدریچ ءَ راھے شون دے اَنت۔
کھولاں گوشتگ که اے زھرشانی تھنا لھتیں مردم ءِ زوربیگواھی ءِ جیڑھ نه اِنت بلکیں بلوچستان ءِ مچی توار اِنت ، اے ایردستی ءِ بگیری ءَ جار اِنت ، اے توار ایرجنگ ءُ دارگ نه بیت چی ءَ که اے توار ءَ چه ماتانی زِرد ءَ چه گھارانی چماں ءُ زھگانی کودی ءَ توکل زرتگ ءُ ودی بیتگ۔
