کراچی: پہ زور بیگواھیں مردمانی آجوئی ءَ کراچی پریس کلب ءِ دیم ءَ برجاھیں زھرشانی نندانک ءَ سی روچ سرجم بیتگ کہ انگت برجاہ اِنت۔ زھرشانی نندانکءَ کسانیں زھگ، پیرزال ءُ آدگہ مردم ساڑی اَنت۔ پہ کھولانی ھمدردی درشان کنگ ءَ جتائی بھرگاں سیادی داروکیں مردم پیداک اَنت۔
چہ زھرشانی نندانک ءَ زور بیگواھیں زاھد الی بلوچ ءِ پت ابدلھمید بلوچ ءِ گوشگ اِنت کہ چہ سرکار ءِ نیمگ ءَ دلبڈی دیگ ءَ ابید مئے یک ورنایے ھم آجو نہ بیتگ۔ مئے آزیزاں چنچو ماہ اِنت کہ بیگواہ کنگ بیتگ اَنت چہ سرکار ءِ نیمگ ءَآیانی بابت ءَ مارا سرپدی دیگ ءَ نہ اَنت۔
آئی ءَ گوشتگ کہ مئے زھگ درکانودی آوار جنگ بیتگ اَنت ما مدام ھمے لوٹ ءَ کنگ ءَ ایں کہ اگاں مئے زھگانی سر ءَ چونیں ھم بھتامے ھست گڑا آمیدگس ءَ پیش کنگ بہ بنت۔ زوریں بیگواھی ڈیھ ءِ آئین ءُ انسانی ھکانی بگیری اِنت۔
ابدلھمید بلوچ ءَ گوں سرکار ءَ لوٹ کرتگ ءُ گوشتگ کہ منی زھگ ءَ ھوار درسیں بیگواھیں مردم یل کنگ بہ بنت۔ دانکہ مئے زھگ آجو کنگ مہ بنت ءُ کھولانی گون ءَ انساپ کنگ مہ بیت مئے زھرشانی برجاہ بیتءُ ما وتی زرمبشت ءَ گیش دراجکش کن ایں۔
