بلوچ نیشنل موومنٹ ( بی این ایم ) ءِ سرکماش ڈاکٹر نسیم بلوچ ءَ وتی شنگ کرتگیں درشانے ءَ بی این اپی ءِ مچی ءِ سر ءَ بیتگیں وتکش بمب تراک ایر جتگ ءُ گوشتگ کہ بی این پی ءِ مچی ءِ نشانگ کنگ اکتر مینگل ءِ کُشگ ءِ دومی ٹوھیں جھد اِنت ، چہ ایشی ءَ پیش آ لانگ مارچ ءِ وھد ءَ گوں وتکش بمب تراکے ءَ نشانگ کنگ بیتگ اَت ، پاکستان ءَ اے ھبر باز رند ءَ پیش داشتگ کہ بلوچستان ءَ نہ اِیوک ءَ سیاست بلکیں ساہ کشّگ ھم ھما وھد ءَ بیت کنت کہ بلوچ ءِ چکچینی ، مچی سزا ، بلوچ ءِ مڈیانی لٹ ءُ پل کنگ ءُ بلوچ ءِ راجی پجار ءُ ھستمان ءِ تباھی ءَ پاکستان ءِ ریاست ءُ پوج ءِ شوندات ءِ دیم ءَ مردم وتی دستاں بہ بند ایت ءُ اَبید ءِ ھچ وڑیں جست ءُ پرس ءَ آیانی سر ءَ کار بہ کنت ،اگاں کسے کمیں ھم آیانی بگیری ءَ پاد آھگ ءِ جھد ءَ بہ کنت ریاست پہ آئی تاوان دیگ ءَ چک ءُ پد نہ بیت۔
آئی ءَ گوشتگ کہ بی این پی ءِ مچی ءِ نشانگ کنگ چوناھا یک کلوھے پہ ھما بلوچ سیاسی گلاں کہ آ پاکستان ءِ جوڑ کرتگیں سیاست ءِ منّوک اَنت ، ایشی ءِ تہ ءَ ھچ وڑیں شک نیست کہ بی این پی ءِ مچی ءُ آئی ءِ سروک اکتر مینگل ریاست ءَ نشانگ کرتگ ، اے نوں ریاست ءِ وتی سر ءَ اِنت کہ اے کار ءَ داھش ءُ وتی آدگہ ٹولیانی نام ءَ بہ من ایت یا کہ اے کار ءَ چیر بہ دنت بلے ریاست ءِ بے تواری آئی ءِ میارباریاں چیر دات نہ کنت۔
ڈاکٹر نسیم بلوچ ءَ گوشتگ کہ مارا گوں بی این پی ءِ سیاست ءَ بُنکی جیڑھ ھست بلے آئی ءِ مچی دیوان ءِ سر ءَ اُرش بلوچ ءِ چکچینی ءِ درچ اِنت ءُ ما آئی ءَ ایر جن ایں ۔ پارلیمانی گل اے گپ ءَ بائد اِنت یاد بہ کن اَنت پاکستان ءَ سیاست ءِ راہ پہ بلوچاں بستگ ءُ ھمینچو گران کرتگ کہ تھنا ھما مردم ساہ کشت کنت کہ آ نہ اِیوک ءَ پاکستانی پوج ءِ منوک بہ بیت بلکیں گوں کم شرپی ءَ پوج ءِ بے ننگیں لوٹانی دیم ءَ سر ءَ جھل بہ کنت ءُ آئی ءِ پرمان ءِ سر ءَ کار بہ کنت۔
آئی ءَ گوشتگ کہ انوں جاور ھما جاہ ءَ سر بیتگ اَنت کہ پاکستان وتی جند ءِ پارلیمان ءِ سوگند وارتگیں باسکانی یک کسانیں گپے ءَ ھم سگ اِت نہ کنت ءُ مئے وتی جند ءِ سرڈگار ءَ سیاست ، گھگیری ءُ جمھوری گوں ناشرکاری ءَ نشانگ کنگ بیت ، اے اُرش ءَ پاکستان ءِ جنگی میارباری گیشتر بے پردگ کتگ ءُ پہ میان استمان ءَ ھمے جست ودی کرتگ کہ بلوچ ءِ ھار مّل اِتگیں ھونانی دیم ءَ آ داں کدی اے وڑ ءَ بے توار بیت کنت۔
ڈاکٹر نسیم بلوچ ءَ وتی درشان ءِ گڈی ءَ گوشتگ کہ جھان بائد اِنت چہ پاکستان ءِ لشکری کِرداں ھمے سبک ءَ بزور ایت کہ اگاں وھدے کہ سردار اکتر مینگل ءِ پیمیں پارلیمانی سیاستدان پھریز نہ اِنت گڑا ھما بلوچ ورنا ، جنین ءُ زھگ کہ آجوئی ءِ واھگ اِش داشتگ پاکستان پہ آیاں چینچو زوراک ءُ ھونوار بیت کنت ءُ زورگپتیں بلوچستان ءِ زوراکیانی آماچیں بلوچ کہ چہ پاکستان ءَ ڈن پہ راجی آجوئی ءَ توار چست کنگ ءُ کار ءَ اَنت اے ناشرکاریں ریاست ءُ آئی ءِ رستری کرد پہ آیاں چیچنو گران ءُ ترسناک بیت کنت۔
