کراچی:پریس کلب ءِ دیم ءَ پہ زوربیگواھیں مردمانی پدجنگ ءَ کھولانی برجاھیں زھرشانی گدان ءَ 31 روچ سرجم بیتگ ، چہ بازیں گرمی ءُ سرکار ءِ یکشلیں دلجمی دیگ ءَ اَبید ھم کھول وتی زھگانی آجوئی ءِ لوٹ ءِ سر ءَ اوشتاتگ اَنت ءُ زھرشانی کنگ ءَ اَنت۔
چہ ملیر ءَ زوربیگواھیں کنگ بیتگیں سادک مراد ءِ آجو بیتگ ءُ وتی گس ءَ سر بیتگ ، آئی ءِ آجوئی ءِ ھال زھرشانی گدان ءَ شنگ بیتگ ءُ کھولاں وشی درشان کرتگ۔
ھمے میان ءَ زوربیگواھیں زاھد بلوچ ءِ پت اَبدالھمید بلوچ ءَ سادک مراد ءِ آجوئی ءِ پژدر ءَ تران کرتگ ءُ گوشتگ کہ سادک ءِ آجوئی ءَ مارا ھمے دلبڈی داتگ کہ آدگہ ورنا ھم بے میار اَنت یکروچے اَلم یل کنگ بنت ءُ گساں سر بنت۔ ما گوں سرکار ءُ ریاستی ادارھاں لوٹ کن ایں کہ آ درسیں بیگواھیں ورناھاں زوت آمیدگسءَ پیش بہ کنت دانکہ آیانی سر ءَ اگاں بھتامے ھست پیشدارگ بہ بیت۔
چوش کہ چہ کراچی ءِ جتائیں دمگاں کلری لیاری ، ماری پور ءُ لال بکھر ءَ بازیں کچے ءَ بلوچ ورنا زوربیگواہ کنگ بیتگ اَت ، آیانی تہ ءَ زاھد بلوچ ، شیراز بلوچ ، سیلان بلوچ ، سرپراز بلوچ ، رمیز بلوچ ، رھیم بکش بلوچ ءُ رھمان بلوچ ھوار اَنت ھمے وڑ ءَ چہ ملیر ءَ میر بالاچ بلوچ ھم لھتیں ماہ پیش زوربیگواہ کنگ بیتگ اَت۔
