کراچی: پہ زوربیگواھی مردمانی پد جنگ ءَ کراچی پریس کلب ءِ دیم ءَ کھولانی برجاھیں زھرشانی گدان ءَ مرچی 32 روچ سرجم بیتگ کہ انگت ءَ برجاہ اِنت۔
ھمے درگت ءَ زوربیگواھیں زاھد بلوچ ءِ پت اَبداُلھمید بلوچ ءَ گوں رسانکدراں تران کرتگ ءُ گوشتگ کہ منی زھگ زاھد بلوچ 17 جولائی 2025 ءِ شپ ءَ چہ کراچی ھند لیاری ءَ ھما وھد ءَ کہ رکشہ ءَ سوار بیتگ زوربیگواہ کنگ بیتگ ، ھندی مردمانی رد ءَ زاھد بلوچ سادگ پوشاکیں کارمند زور چہ رکشہ اِیر گیپتگ ءُ رکشہ ءِ ھواری ءَ گوں وتءَ بُرتگ ، چہ آ وھد ءَ پد آئی ءِ ھچ وڑیں ھال نیست۔
آئی ءَ گوشتگ کہ منی زھگ ءَ چہ کراچی زانشجاہ ءَ وتی وانگ آسر کرتگ ءُ رکشہ ءِ سر ءَ کار ءَ بیتگ ءُ وتی کھول ءِ والینگ ءَ شپ ءُ روچ جپاکشی کرتگ ۔ اگاں آئی ءِ سر ءَ چونیں بھتامے ھست آمیدگس ءَ پیش کنگ بہ بیت ، کانود بائد اِنت کہ پہ ھرکس ءَ یک وڑ ءَ بہ بیت۔
اَبدالھمید بلوچ ءُ آدگہ کھولاں گوں انسانی ھکانی گل ، سول سوسائٹی ءُ رسانکدراں لوٹ کرتگ ءُ گوشتگ کہ پہ درسیں بیگواھیں ورناھانی آجوئی ءَ توار چست اَنت ۔
