کراچی ءَ پہ زوربیگواھیں مردمانی آجوئی ءَ کھولانی نیمگ ءَ کراچی پریس کلب ءِ دیم ءَ برجاھیں زھرشانی نندانک ءَ سی ءُ ھپت روچ سرجم بوتگ۔ چہ ترندیں ھورانی گوارگ ءَ ابید کھول پہ وتی مردمانی آجوئی ءَ ھور ءِ سرءَ نشتگ اَنت۔
بیگواھیں زاھد الی بلوچ ءِ پت ابدُلھمید بلوچ ءَ تران کرتگ ءُ گوشتگ کہ منی زھگ وتی کھول ءِ والینوک بیتگ کہ آ بے میار ءَ بیگواہ کنگ بوتگ ۔ اگاں زاھد بلوچ ءِ سر ءَ چونیں بھتامے ھست گڑا آمیدگس ءَ پیش کنگ ءُ کانود ءِ رد ءَ کاروائی کنگ بہ بیت۔
آئی گوشتگ کہ ڈیھ ءِ کانود ءَ پہ درساں یک بوگ لوٹ ایت ءُ کس ءَ اے ھک نیست کہ آ راھبند ءُ کانود ءَ ابید شھریاں سزا بہ دنت۔
زھرشانی کنوکاں گوشتگ کہ ھور، گرم یا چونیں ھم جنجالے مارا نزور کرت نہ کنت۔ مئے لوٹ ھمیش اَنت کہ مئے آزیز پہ سلامتی دیم ءَ آرگ بہ بنت آیانی سر ءَ چونیں بھتامے ھست گڑا آمیدگس ءَ پیش کنگ ءُ انساپ دیگ بہ بنت۔
