بلوچ آجوئی لوٹوکیں رھشون ءُبی ایل ایپ ءِ سروک ڈاکٹر اللہ نزر بلوچ ءَ وتی شنگ کرتگیں درشانے ءَ گوشتگ کہ زورگپتیں جموں کشمیر ءَ پاکستان ءِ برجاھیں زوراکیاں ایر جن آن ءُ پاکستان ءِ زورگپتیں جموں کشمیر ءِ لس مھلوک ءِ گون ءَ ھمدردی درشان کن آں۔
ڈاکٹر اللہ نزر بلوچ ءَ گوشتگ کہ کشمیری زرمبشت ءِ نہ ترسیں کارکنانی جوزگ ءَ دروت ندر کن آں۔ من آیانی شھیداں ستک شانی ندر کن آں کہ آیاں پہ شرپ، وتواکی ءُ پہ سرڈگارءِ آجوئی ءَ وتی جانانی دیمونی داتگ۔ آیانی دیمونی گوستانک ءِ تہ ءَ نبیسگ بنت، چی ءَ کہ کشمیری ورنا چہ وتی ھون ءُ توکل ءَ یک بے مٹیں گوستانکے نبیسگ ءَ اَنت ءُ پہ وتی آجوئی ءَ چہ کھول ءُ مھلوک ءَ سرگوستگ اَنت۔
آئی ءَ گوشتگ کہ راستی، سرپدی، زانت ءُ باسمائیءَ چہ بندات بیتگیں زرمبشت چہ زور ءَ ھلاس نہ بنت۔ چہ زانت ءَ ودی بیتگیں جھد گوستانک ءِ تہ ءَ بے مٹیں درے نبیس ایت۔ کشمیریانی ھوناں پاکستان ءِ مکاری پاشک کرتگ ۔ اسلام ءِ براتی ءُ وتگڑیں دو راجی لیکہ ءِ دروگیں کول ءِ تہ ءَ چیر بیتگیں پاکستان نوں یک زورگپتیں تاکتے ءِ وڑءَ دیمءَ پیداک اِنت کہ آ کودکیں کشمیریانی ھوناں ریچگ ءُ زوراکی کنگ ءَ اِنت۔
بلوچ راجی رھشون ءَ گوشتگ کہ بلوچ راج گوں کشمیری زرمبشت ءِ نہ ترسیں گھگیری کنوکانی گون ءَ اوشتاتگ۔ شمئے جھد مئے جھد اِنت۔ شمئے درد ئے درد انت۔ پہ تچکیں آشوب ءَ بودناکی ءُ شوربندی ءِ گون ءَ پہ سوبمندی ءَ یکشلیں گھگیری ھژدری اِنت۔
آئی ءَ گوں کشمیریاں دلگوش گور کرتگ ءُ گوشتگ کہ کشمیری مات، گھار، جنک ءُ بچکاں شما ایوک نہ اِت۔ بلوچ مھلوک ءُ مئے آجوئی ءِ سپاھی درس گوں شما ھمراہ اَنت ءُ اوشتاتگ اَنت۔
