آواران: مرچی بامگواہ ءَ زورگریں پاکستانی لشکر ءَ بیڑ برتگ ءُ ورنایے آوار جنگ ءَ پد تیرگواری کرتگ ءُ کشتگ۔
کشگ بیتگیں ورنا ءِ نام ھنیپ بلوچ ء ازیز اِنت کہ جاھو ءِ میتگ ٹوبو کڈ ءِ جاہ منند اِنت۔ زورگریں پاکستانی لشکر ءُ چیریں ادارھانی کارمنداں مرچی سھب ءِ پنچ ءَ گس ءَ بیڑ برتگ ءُ گوں مردماں زوراکی کنگ ءَ پد آوار جتگ ءُ گوں وت برتگ۔ ھنیپ بلوچ چہ گساں کمیں دور کشگ ءُ آئی ءِ لاش چگل دیگ بیتگ۔
کشگ بیتگیں ورنا ھنیپ بلوچ ءِ بابت ءَ گوشتگ بیت کہ آ گوں گاڑی یے ءَ کار ءَ بیتگ کمیں روچ بیت آئی موکل کرتگ ءُ گس ءَ اتکگ۔
انچوش گوشگ بوگ ءَ اِنت کہ پاکستانی لشکر ءَ چہ ٹوبو کڈ ءَ ابید ملان ءُ کِر ءُ کشان لشکر کشی کرتگ ءُ گس پٹ ءُ پول کرتگ اَنت ءُ گوں مردماں زوراکی کرتگ۔
چوش کہ دو روچ پیش چہ کولواہ ءِ میتگ گشانگ ءَ ساجد ء مستری ناسر نامیں ورنایے آوار جنگ بیتگ ءُ پد ءَ آئی ءِ تیرسپتگیں لاش چہ مالار چیل ءَ دست کپتگ اَت۔
