بلوچ نیشنل موومنٹ ( بی این ایم ) ءِ چیئرمین ڈاکٹر نسیم بلوچ ءَ ماں رسانکدر ءَ وتی شنگ کرتگیں درشانے ءَ گوشتگ که 14 اگست 2013 ءَ پاکستانی پوج ءَ بلوچ نیشنل موومنٹ ءِ سروک امداد بجیر ءِ گس انگر کرتگ ءُ آ نشانگ کرتگ اَنت ، اے رستری اُرش ءَ امداد بجیر شھید بیتگ ، آئی ءِ ھواری ءَ بی ایس او آزاد ءِ ورنا ءُ نہ ترسیں بنجاھی کارگشاد رزا جھانگیر ھم شھید بیتگ۔
آئی ءَ گوشتگ که آ روچ په آیانی کھولاں چو ھمک روچ ءِ پیم ءَ بندات بیتگ اَت بلے آیاں داں بیگاہ ءَ بلوچی بیرک ءَ مانپوشوک بیتگ۔ ، زمین چه هما مردمانی رتکگیں اَرساں تر اَت که آیاں وتی آزیز نه بلکیں یک راجے ءِ اوست چست کرتگ ءُ آیاں کوپگ دیگ ءَ بیتگ اَنت ۔ آپسر مرچی ھم ھمے ارش ءَ مارگ ءَ اِنت۔ نه ایوک ءَ په دو مردم ءِ بیران بوگ ءَ بلکیں په ایشی ءَ که چه اے ویل ءَ پد یک بے تواری یے ودی بیتگ۔
ڈاکٹر نسیم بلوچ ءَ گوشتگ که امداد بجیر بیھارانی دیم ءَ نزور نہ بیتگ ءُ ھمک وھد ءَ بلوچستان ءِ آجوئی ءِ ارادہ ءِ سر ءَ اوشتوک بیتگ۔ ،رزا جھانگیر تھنا یک ورنایے نه اَت بلکیں آ ھمے پدریچ ءِ ته ءَ توکل ءِ چیدگ اَت که آئی ءَ زورگری ءِ دیم ءَ وتی سر جھل نه کرتگ آ تچک ءَ گوں وتی مول ءَ بندوک بیتگ اَنت۔
آئی ءَ گوشتگ که آیانی شھیدی یک انچائیں ویلے نه اَت بلکیں په بلوچ راجی زرمبشت ءِ نزور کنگ ءَ یک مھکمیں شوربندی یے ءِ بھر اَت که ھمے پارست ءَ سسا ءُ دلانی نشانگ کنگ بیتگ اَت ، بلے جھد ءِ نزور بوگ ءِ جاه ءَ آیانی شھیدی ءَ جھد گیش مھکم کرتگ۔
ڈاکٹر نسیم بلوچ ءَ گوشتگ کہ ما مرچی آیاں گیر کار ایں کہ آ پمشکا کشگ بیتگ اَنت آ چہ زوراکیاں آجوئیں بلوچستانے ءِ لوٹوک بیتگ اَنت۔ ما آیاں پمشکا گیر کار ایں کہ آیانی ھون مرچی ھم ھمے ڈگار ءِ بھراَنت۔ پہ آجوئی ءِ نھاد ءَ آ مدامی نمیران بیتگ اَنت۔
آئی ءَ گوشتگ که امداد بجیر ءُ رزا جھانگیر کدی شموشگ نہ بنت، پشت ماں پشت ءَ روان کن اَنت۔ مئے سوت، مئے کسہ ءُ مئے جھد ءِ میان ءَ داں ھما وھد ءَ زندگ مان اَنت دانکہ بلوچستان آجو نہ بیتگ۔
