شال: گوستگیں روچ ءَ بی این پی ءِ زھرشانی ءِ سر ءَ بیتگیں وتکش ارش ءِ بگیری ءَ بیوکیں زھرشانی ءِ سر ءَ پولیس ءَ بیڑ برتگ ءُارسی گیس جتگءُ باز مردم دزگیر کرتگ ءُ گوں وت برتگ۔
بنشون ءِ رد ءَ گوں بلوچستان نیشنل پارٹی ءَ یکجھتی کنگ ءَ شال ءِ سرجمیں شھر بند کنگ بیتگ۔ زھرشانی کنوکاں بلوچستان اسمبلیءَ روکیں دگ ریلوے اسٹیشن ءِ نزیک ءَ بستگ ءُ بالی پٹ دگ ھم بند کنگ بیتگ۔
جتا جتائیں جاھاں پولیس ءُ زھرشانی کنوک گر ءُ چیل بیتگ اَنت کہ چہ پولیس ءِ نیمگ ءَ زھرشانی کنوک لٹ ءُ کٹ کنگ بیتگ اَنت ءُ پولیس ءَ ارسی گیس ھم جتگ۔ بازیں کچے ءَ زھرشانی کنوکانی دزگیر کنگ ءِ ھال اِنت۔
انچوش گوشگ بوگ ءَ اِنت کہ دزگیر کنگ بیتگیں مردمانی تہ ءَ نودربراں ھوار بلوچ ءُ پشتون سروک ھم گون اَنت۔
بلوچ اھوالکار نیاز بلوچ ءِ رد ءَ مستونگ ءَ ھم زھرشانی ءِ سر ءَ پولیس ءَ بیڑ برتگ ءُ بی این پی ءِ سروک لالا گپار مینگل، بی ایس او ءِ چیئرمین جھانگیر بلوچ، نیشنل پارٹی ءِ سروک میر سکندر، پی ٹی آئی ءِ امان اللہ بنگلزھی ءُ بی این پی ءِ کارکن ملک ابدرھمان دزگیر کرتگ۔
آئی ءَ گوشتگ کہ چہ لورلائی ءَ تھریک انساپ ءِ سروک اسپند یار ھان ھم دزگیر کنگ بیتگ۔
چہ آل پارٹیءِ نیمگ ءَ کیچ ءُ گوادر ءَ تھتگ بند ءُ دگ بند ھرتال کنگ بیتگ۔
