پاکستانی پوج ءِ دست ءَ زور بیگواھیں بلوچ نودربر سروک شبیر بلوچ ءِ گھار سیما بلوچ ءَ وتی شنگ کرتگیں تامربندے ءَ گوشتگ کہ شبیر بلوچ ءِ زوریں بیگواھی ءَ نُھ سال سرجم اِنت کہ انگت ءَ بیگواہ اِنت۔
آئی ءَ گوشتگ کہ شبیر یک کسانیں وھدے ءَ سیاست بندات کرتگ، آئی پما جیڑگ یلداتگ ءُ سرجمیں بلوچستان وتی کرتگ ۔ شبیر بلوچ پہ وتی راج ءَ وتی سرجمیں زند ندر کرتگ ءُ آ گار ءُ بیگواہ بوت، نوں نُھ سال سرجم بوگ ءَ اِنت کہ آ زنداناں بندیگ اِنت کہ آئی ھچ وڑیں ھال نیست۔
سیما بلوچ ءَ گوشتگ کہ ما اے نُھ سالاں کجام درد ءُ رنجانی دیمپان بوتگ ایں ما ایشی ءَ درشان کرت نہ کن ایں۔ یک ماتے وتی زھگ ءَ نُھ ماہ لاپ ءَ کنت ءُ پد ءَ آئی رودین ایت ءُ مزن کنت آ پہ دگر ءِ چارگ ءَ شات نہ بیت، بلے منی مات ءَ نُھ سال بیت کہ شبیر نہ دیستگ بہ جیڑ اِت کہ آئی ھال چے بیت۔ نُھ سال اِنت ما ھمے ودار ءَ زندگ ایں کہ مرچی باندا شبیر کیت۔
آئی ءَ گوشتگ کہ شبیر ءِ زوریں بیگواھی ءَ نُھ سال سرجم بوگ ءَ ما کیچ ءَ روانکے کش ایں ما چہ کیچ ءِ مھلوک ءَ دزبندی کن ایں کہ آبیا اَنت ءُ اے روانک ءَ بھر بزور اَنت ءُ مئے گون ءَ ھمتوار بہ بنت ءُ پہ شبیر بلوچ ءَ توار چست بہ کن اَنت۔
سیما بلوچ ءَ گوشتگ کہ چار اکتوبر ءَ شھید پدا اھمد چاراہ ءَ ما شمئے وداریگ ایں، شمئے توار بوت کنت کہ پما وشیں بانداتے بیارایت۔
