چہ بلوچ نیشنل موومنٹ ( بی این ایم ) ءِ انسانی ھکانی ادارہ پانک ءِ نیمگ ءَ زور بیگواھیں بلوچ نودربر سروک شبیر بلوچ ءِ زوریں بیگواھی ءِ نھمی سالروچ ءِ درگت ءَ ایکس ( ٹویٹر ) ءِ اسپیس ءَ دیوانے برجم دارگ بیتگ۔
اے دیوان ءِ جارچینی زمہ واری بی این ایم ءِ بنجاھی پتر ءِ باسک ریاز بلوچ ءَ گوں بیتگ اَنت کہ ایشی مھمان بلوچ نیشنل موومنٹ ءِ بنجاھی کارگشاد دل مراد بلوچ انسانی ھکانی کارگشاد ڈاکٹر نازر نور، پانک ءِ رھوتدار جمال بلوچ، زور بیگواھیں شبیر بلوچ ءِ گھار سیما بلوچ ءُ بی وائی سی ءِ سروک ءُ زور بیگواھیں ڈاکٹر دین مھمد جنک سمی دین بیتگ۔
دیوان ءَ تران کنان ءَ بی این ایم ءِ کارگشاد دل مراد بلوچ ءَ گوشتگ کہ شبیر بلوچ امر ءَ کسانیں مردمے بیتگ بلے آئی ءِ تہ ءَ یک رھشونی ءِ بودناکی یے بوتگ آئی کسانیں وھدے ءَ وت ءَ ھما جاہ سر کرتگ کہ آ یک نودربر گلے ءِ سروک بوتگ۔
آئی ءَ گوشتگ کہ مرچی اگاں آئی گھار سیما بلوچ انچو مھکم اِنت ءُ چہ آئی دل ءَ چاگرد ءُ ریاست ءِ زوراکیانی ترس در اتکگ ءُ بلوچ جنینانی سروکی ءِ کرد ءَ پیلو کنگ ءَ اِنت ایشی ھیلکاری چہ آئی ھند ءِ گس ءَ شبیر ءِ دیوان ءَ بیتگ۔
بی این ایم ءِ انسانی ھکانی کارگشاد ڈاکٹر نازر نور ءَ تران کرتگ ءُ گوشتگ کہ یک آشوبی کارکنے چہ درساں پیش وتی کھول ءَ تیار ءُ مھکم کنگ شبیر بلوچ ھما سنگت بوتگ کہ آئی وتی کھول مھکم کرتگ کہ آئی گس پہ سنگتاں یک مھکمیں بندرے بوتگ۔ مرچی ھما شبیر جان ءِ جھدانی برورد اِنت کہ آئی گھار سیما بلوچ گوں مھکمی ءَ جھد کنگ ءَ اِنت۔
بی وائی سی ءِ سروک سمی دین ءَ گوشتگ کہ اے ھبر راستے مردم گوش اَنت سیما ءِ جھد پہ شبیر بلوچ ءِ آجوئی ءَ اِنت بلے گوں ایشی ءِ ھوار سیما بلوچ پہ آدگہ درسیں بیگواھیں مردمانی کھولاں یک مھکمیں توانے جوڑ بیتگ۔ من ھمے سرپد باں کہ بیگواھیں مردمانی کھولاں بے توار بوگی نہ اِنت پہ وتی مردمانی آجوئی ءَ در کپگ ءُ جھد کنگی اِنت۔
سیما بلوچ ءَ گوشتگ کہ شبیر بلوچ چہ کساں امری ءَ آئی گس ءُ کھول ءِ زمہ واری ءِ پیلو کنگ ءِ ھواری ءَ وتی راجی زمہ واری ھک پیلو کرتگ اَنت ءُ مئے رھشون بیتگ۔ شبیر بلوچ ءَ مارا اے سکین داتگ کہ اے جھد ءِ میان ءَ جَنگ ءُ کشگ، زوریں بیگواھی ءُ جنجال ھست۔ اَنت بلے پد کنزگی نہ اِنت۔ من ھم وتی جھد ءَ برجاہ داراں ءُ شبیر ءَ چہ زندان ءَ آجو کناھین آں ءُ جھان ءَ ھمے پیش داراں کہ گھگیری چی یے۔ دانکہ ساہ مان اِنت پہ شبیر ءِ آجوئی ءَ جھد کن آں ءُ آدگہ بیگواھیں مردمانی کھولانی توار جوڑ بہ آں۔
جمال بلوچ ءَ گوشتگ کہ ریاست پہ اے مردمانی جھد ءِ دارگ ءَ آیانی بے اوست کنگ ءِ کوشست ءَ کنت ھمے پندل سازی ءَ کنت شمئے مردم نیست بلے مارا بے اوست بوگی نہ اِنت چوشیں ھم مردم بوتگ کہ آ دہ سال ءِ زوریں بیگواھی ءَ پد آجو بیتگ اَنت۔ بلوچ ھچبر ءَ ریاست ءِ پندلانی آماچ نہ بیت ءُ چہ وتی جھد ءَ دزکش نہ بیت۔
