بلوچ اسٹوڈنٹ ایکشن کمیٹی( بساک ) ءِ بنجاھی جارکش ءَ وتی شنگ کرتگیں درشانے ءَ گوشتگ کہ اُستاد چاگرد ءِ ھما رھبریں کارِست اَنت کہ آ راجمان ءِ ھمک سُرپُراں نہ تھنا شیوار بنت بلکیں ورنا ءُ زھگانی پہ آوکیں رُژنائیں باندات ءَ رھشونی کنان ءَ راجی جوڈشت ءَ وتی گران بھائیں کردار ءَ پیلو کت کن اَنت۔ یک راج یے ءِ پدریچ ءِ باسما بیگ ءُ نابود بیگ ءِ گیشتریں گِر ءُ دار اُستادانی زمہ ءَ بنت کہ آ وتی راج ءَ گوں چِنچو ایمانداربیت ءُ ھستیں پدریچ ءَ کجام رنگیں درس دنت ءُ راجمان ءَ سِنگارگ ءِ راجی زمہ واری ءَ پیلو کنت۔
آئی ءَ گوشتگ کہ بلوچ راج ءِ تہ ءَ ھم بازیں باکرداریں اُستاد ھست کہ آ وتی شپ ءُ روچاں پہ بلوچ راج ءِ پدریچ ءَ زانت ءُ زانشت ءَ چہ آژنا کنگ ءِ سپر ءَ راھی اَنت، آیانی جھد ءُ جوزگ پہ ورنایاں توانائیں سکینے اَنت۔ بلے دومی نیمگ ءَ انچیں ھم اُستاد ھست کہ ھستیں وانگی راھبند ءَ آھانی رُژنائیں ھیال زَنگین کُتگ ءُ آ جتائیں ھیلہ ءُ نیموناں چہ وتی راجی زمہ واریاں دیر ءُ گِستا اَنت۔
جارکش ءَ گوشتگ کہ بلوچ اُستاداں لوٹ ایت آ بلوچستان ءِ کجام ھم میتگے ءُ شھرے ءَ وانینگ ءَ بنت، وتی نودربراں چہ ھکی ئیں زانت ءُ زانشت ءَ آژنا بہ کنائین اَنت، آھاں جُست کنگ، پٹ ءُ پول کنگ ءُ بلوچ راجمان ءَ چہ ھمک ڈولیں بدیں سِلکاریاں چہ پاک ءُ پلگار کنگ ءِ سکین ءَ بہ دیے اَنت دانکہ بلوچ نودربر باسمائیں، بودناکیں ءُ املی ئیں ورنا بہ بنت ءُ در بیا اَنت ءُ بلوچ راجمان ءَ رُژنائیں بانداتے ءِ جوڈ کنگ ءَ پہ راجی زمہ واری ءَ پیلو بہ کن اَنت۔
آئی ءَ گوشتگ کہ اے جاوراں بلوچ یک راجی جوڈشتے ءِ سپر ءَ رھادگ اِنت، کُلیں اُستادانی زمہ واری بیت کہ آ وتی راجی زمہ واریاں چہ پُشت کنز بیگ ءِ جاہ ءَ دیم ءَ بیا اَنت ءُ بلوچ زھگ ءُ ورنایانی پہ آوکیں رُژنائیں باندات ءَ رھبری بہ کن اَنت۔ بلوچ نودربرانی ھم زمہ واری بیت کہ آ گوں اُستاداں رھبری ءِ سیادی ءَ مھکم کنان ءَ آھاں گوں نزیکی بہ کن اَنت ءُ بلوچ راجمان ءَ زانت ءُ زانشت ءِ کندیل ءَ روک کنان ءَ سرجمیں آتراپ ءَ رُژنا بہ کن اَنت۔
