بلوچ اسٹوڈنٹس ایکشن کمیٹی ءِ جارکش ءَ وتی شنگ کرتگیں درشانے ءَ گوشتگ کہ بلوچ اسٹوڈنٹس ایکشن کمیٹی اکتوبر ءَ وتی چارمی بنجاھی لس دیوان ءَ بلوچ زالبولیں جھدکارانی نام ءُ نمیرانیں بلوچ نبشتہ کار اتاء شاد ءُ آزات جمالدینی ءِ یات ءَ برجم دار ایت۔
آئی ءَ گوشتگ کہ گل ءِ چارمی بنجاھی لس دیوان بلوچ نودربر سیاست ءَ نوکیں ءُ پُرارزشتداریں کار ءُ پالیسیانی سازگ ءِ تلوئے کہ اود ءَ پہ آوکیں پدریچ ءَ نوکیں پنت ءُ سلاہ ٹھین ایت کہ آ بلوچ ورنایانی نہ تھنا پگری رھشونی ءَ کن اَنت بلکیں بلوچ راج ءِ راجی جوڈشت ءَ پہ جوانیں کِردارے پیلو کنگ ءِ دَرے پچ کن اَنت۔ اےدیوان ءَ بلوچ ورنایانی ھما پِگری ءُ زانشتی دیوان اِنت کہ آئی ءِ تہ ءَ بلوچ ورنا وتی راجمان ءِ جتائیں تھرانی سر ءَ دلجمیں رنگے ءَ زانشتی باوست کنان ءَ بلوچ نودربر سیاست ءَ پہ گیش مھکم ءُ توانا کنگ ءَ شوربندی ساز اَنت۔
آئی ءَ گوشتگ کہ ادارہ ءِ اے سپر کہ چارمی بنجاھی لس دیوان ءَ سر بیتگ، وتی تہ ءَ ادارتی، پگری ءُ رھشونی جھت ءَ گیش مھکم بیگ ءِ درور اِنت۔ اے دور ءَ کہ بلوچ نودربر جتائیں ویل ءُ گپچلاں چہ کردی ءُ ساچشتی پِڑاں دیر دارگ بیگ ءَ اَنت، پہ ما راجی زمہ واری گیش بنت کہ ما وتی ورنایاں چہ اے گپچلاں کشگ ءَ وتی سرجمیں زور ءُھاٹیگ ءَ کار بہ بندین ءُ گوں اگل ءُ زانشت ءَ بلوچ ورنایاں نوکیں ءُ گھتریں رھشونی ءِ موھے بہ سازیں۔ مئے سِتک ءُ اُمیت اِنت کہ بساک ءِ چارمی بنجاھی لس دیوان پہ بلوچ ورنایاں نوکیں کِشکے ءِ دراں پچ کنگ ءِ دلجمیں دیوانے بیت۔
آئی ءَ گوشتگ کہ گل وتی چارمی بنجاھی دیوان ءَ بلوچ زالبولیں جھدکارانی نام ءَ ندر کنت کہ آ مُدام بلوچ سیاست ءِ تہ ءَ اولی لڑا اوشتوکیں کارِست اَنت ءُ ھزار بند ءُ گپچلانی دیمپان بیگ ءَ پد ھم وتی راجی زمہ واریاں چہ پُشت کنز نہ بنت ءُ گوں مھکمی ءَ راجی جھد ءَ کردی دروشم ءَ ھوار اَنت۔ ءُ اے دیوان بلوچ نبشتہ کار ءُ لبزانکار اتاء شاد ءُ آزات جمالدینی ءِ یات ءَ کہ آیاں پہ بلوچ لبزانک ءَ نوکیں در پچ کتگ ءُ مدام بلوچ راجمان ءِ گھتر سازگ ءَ پہ نبشتھی دروشم ءَ وتی گران بھائیں کردار پیلو کُتگ۔
آئی ءَ گوشتگ کہ بنجاھی لس دیوان ءِ جاہ، رمس ءُ ایدگہ اھوال زیت رسانکدر ءَ شِنگ کنگ بنت۔
