بلوچ نیشنل موومنٹ ( بی این ایم ) ءِ پیشیگیں چئیرمین ھلیل بلوچ ءَ وتی شنگ کرتگیں درشانے ءَ گوشتگ کہ نواب اکبر ھان بگٹی ءِ شھیدی مارا ھمے یات ءَ دنت کہ پاکستان ریاست ءِ راھبند ءُ کانود ءَ شرپمندیں سیاست ءِ ھچ گنجاھشت نیست، چی ءَ کہ پاکستان یک زورگر ءُ بلوچ زورگپتیں دمگ ءَ پاکستان ھچ وڑ ءَ وتی سروکی ء ھواری ءَ وتی نوک آبادکاریں رویشت ءَمٹ کرت نہ کنت۔ پمشکا کہ جھان ءِ کجام ھم جاہ ءَ نوک آبادکارانی تب یک وڑ بیت کہ آ زورگپتیں دمگانی مردماں ھمے وڑ ءَ دار اَنت کہ ھچ جاہ ءَ سر چست کرت یا وتی راجی ھستمان ءُ پدریچ ءِ جھد ءَ کرت مہ کن اَنت۔ چے کہ پاکستان ءَ برزشانیں نواب اکبر ھان ءِ گون ءَ کرتگ بلے آ زانوگریں سیاستدان نواب اکبر ھان بگٹی ریاست ءِ دیم ءَ سر جھل کنگ ءِ جاہ ءَ جان ءِ دیگ ءَ جاڑیگ بیتگ کہ اے پہ شریں سروکاں یک مزنیں پنتے کہ مرچی بلوچ سروک کج ءَ ھم ھمے سرپد بنت کہ پاکستان ءِ تہ ءَ شرپ ءِ زندگی یے گوازینت کن اَنت گڑا مرچی ھم وھد ھست کہ آ وت ءَ شر بہ کن اَنت۔
آئی ءَ گوشتگ کہ نواب بگٹی نہ تھنا یک ٹکی سردار یا مزنیں سیاسی سروکے بیتگ بلکیں یک پولکاریں دانشور، زانوگر ءُ جیڑھانی سرپد بیوکیں سیاستدانے اَت۔ آ یک سیاسی سروکے ءَ ابید لبزانک، گوستانک ءُ لیکہ ءِ یک جوانیں زانوگرے بیتگ۔ گوستانک ءَ بلد بیتگ کہ آ پیرانسری ءُ نادراھیاں ابید پوج ءِ زوراکیانی دیم ءَ سر جھل نہ کرتگ ءُ پہ وتی راجی شرپ ءِ دیمپانی ءَ شھید بیتگ۔ اے دیمونی گوں بلوچ راجی گھگیری ءِ نوکیں توان ءُ مھکمی ءِ بنیاد ءَ ھوار اِنت۔
ھلیل بلوچ ءَ گوشتگ کہ شھیدی ءِ نوزدھمی سالروچ ءِ درگت ءَ نواب اکبر ھان بگٹی ءَ دروت ندر کن آں۔ آئی دیمونی مارا ھمے پنت ءَ دنت کہ نوک آبادکاریں زوراکی ءِ دیم پہ دیم ءَ شرپمندیں مرگ چہ ایردستی ءِ زندگی ءَ ارزیشت دار ایت۔ بلوچ راجی زرمبشت آئی کلوہ ءُ دیمونیاں تچکیں راھے جوڑ کنت ءُ وتی آجوئی ءِ جھد ءَ برجاہ دار ایت۔
