شال: گوستگیں روچ ءَ ڈاکٹر ماہ رنگ بلوچ ءُ بی وائی سی ءِ آدگہ سروک اَبید وکیل ءُ کھولانی ھال دیگ ءَ بے تواری ءَ آمیدگس ءَ پیش کنگ بیتگ اَنت ءُ پہ دگہ پنچ روچ ءِ ریمانڈ ءَ پولیس ءِ دست ءَ دیگ بیتگ اَنت۔
کھولاں گوشتگ کہ بی وائی سی ءِ سروک ڈاکٹر ماہ رنگ بلوچ ، بیبو بلوچ ، گلزادی بلوچ ، بیبرگ زھری ءُ سبگت اللہ شاہ جی ءِ بابت ءَ ساری ءَ گوشگ بیتگ اَت کہ 5 ستمبر ءَ آمیدگس ءَ پیش کنگ بنت بلے 5 ستمبر ءِ جاہ ءَ زی 6 ستمبر ءَ اَبید ءِ وکیل ءُ کھولانی ھال دیگ ءَ آمیدگس ءَ پیش کنگ بیتگ اَنت ، ھمے میان ءَ گوستگیں روچ ءَ شال ءَ دامگ ھم بند کنگ بیتگ اَنت۔
ڈاکٹر ماہ رنگ ءِ گھار نادیہ بلوچ ءَ اے بابت ءَ گوشتگ کہ پاکستان ءِ راھبند آرٹیکل A-10 کہ شھریاں انساپ ءُ دیپمانی ءِ ھک ءَ دنت ءُ ھمے وڑ ءَ آرٹیکل 10 کہ بے موکل ءَ دزگیری ءُ بندیگ کنگ ءِ بارو ءَ اِنت بی وائی سی ءِ سروکانی بے تواری ءَ آمیدگس ءَ پیش کنگ اے راھبندانی تچک ءَ بگیری اِنت۔
آئی ءَ گوشتگ کہ اے کار راھبندانی پروشگ اِنت ءُ چہ ایشی ءَ ھمے گپ پدر بیت کہ ریاست ءِ کانود ءُ راھبنداں مان نیارگ ءَ اِنت ءُ گوں ماہ رنگ ءُ آئی ءِ سنگتاں نا انساپی کنگ اِنت۔
بلوچ یکجھتی کمیٹی ءَ ھم اے ویل پژدر ءَ گوشتگ کہ اے ھیرانی گپے کہ آمیدگس ءِ اے چیریں کاروائی 6 ستمبر ءَ ( یوم دفاع ) ءِ درگت ءَ کنگ بیتگ ، اے روچ ءَ موکل بیتگ اَنت ءُ ھچ وڑیں وکیل آمیدگس ءَ ساڑی نہ بیتگ۔
بی وائی سی ءَ اے جاورانی بابت ءَ بژن درشان کرتگ ءُ گوشتگ کہ ماہ رنگ بلوچ ءُ آدگہ سروک دروگیں بھتامانی نشانگ کنگ بیتگ اَنت۔
