شال ءِ ھند ماڈل ٹاون ءَ پاکستانی پوج ءِ کیمپ ءَ وتکش ارشے ءَ پاکستانی پوجءِ بازیں کچے ءَ جانی تاوان ءِ ھال اِنت۔
بنشون ءِ رد ءَ پاکستانی پوج ءِ کیمپ ءِ مزنیں دروازگ گوں تراکناکیں شورھاں باریں گاڑی یے ءَ نشانگ کنگ بیتگ کہ چہ ایشی ءَ پد سلاہ بندیں مردماں تیرگواری بندات کرتگ۔ تراک ءِآسر ءَ کیمپ ءِ دیم ءَ اوشتاتگیں باز گاڑی ھم تباہ بیتگ اَنت۔
اےبابتءَ سرکار ءِ گوشگ اِنت کہ بندات ءَ وتکش ارشکار ءَ گوں سوزوکی یے ءَ کیمپ ءِ مزنیں دروازگ نشانگ کرتگ کہ چہ ایشی ءَ پد پنچ ارشکاراں کیمپ ءَ پترگ ءِ جھد کرتگ کہ آ جنگ بیتگ اَنت۔
اے بابت ءَ جانداراھی تک ءِوزیر ءِ گوشگ اِنت دہ مردم مرتگ ءُ سی ءُ سے مردم ٹپی بیتگ۔ لاش ءُ ٹپی بیتگیں مردم نادراھجاہ ءَ برگ بیتگ اَنت۔
نادراھجاہ بنشون ءِ رد ءَ چہ ٹپی بیتگیں مردماں نوزدہ مردم پہ الاج ءَ آرگ بیتگ کہ آیانی تہ ءَ جنین ھم ھوار اَنت۔ چہ ٹپی بیتگیں مردماں لھتیں مردمانی نام سابرہ، ھسن، ھمرا،سھد اللہ، سردار، بھت بی بی، جمشید، زاکرہ، سید نور، ھیبت اللہ، سید اللہ، نریش کمار، جول گل ءُ کدر اِنت۔
بلے اے ارش ءِ زمہ واری انگت ءَ ھچ گل ءَ نہ زرتگ۔
