کیچ: بلوچ وومن پورم کیچ ھنکین ءُ بلوچ یکجھتی کمیٹی کیچ ھنکین ءَ شبیر بلوچ ءِ زوربیگواھی نھ سال ءِ سرجم بوگ ءَ کھول ءِ نیمگ ءَ کشگ بیوکیں زھرشانی ءِ پلہ مرزی کرتگ۔
آیانی گوشگ اِنت کہ شبیر بلوچ ءَ پاکستانی پوج ءَ 4 اکتوبر 2016 ءَ چہ کیچ ءِ ھند گورکوپ ءَ آوار جتگ ءُ بیگواہ کرتگ، شبیر یک نودربر رھشونے ءُ آئی وتی سرجمیں زند پہ بلوچ راج ءِ وشیں باندات ءَ داتگ۔ چار اکتوبر 2025 ءَ آئی زوریں بیگواھی ءَ نھ سال سرجم بوگ ءَ اِنت کہ آ ریاستی زنداناں آزار سگگ ءَ اِنت ، شبیر ءِ کھول ءَ پہ آئی آجوئی ءَ ھر ھما در ٹُک اِتگ اَنت کہ اود ءَ اُمیتے بوتگ بلئے داں روچ ءِ مرچی آئی ھچ ھال نیست ، گوستگیں نھ سال اِنت کہ سیما پہ وتی برات ءِ آجوئی ءَ جھد کنگ ءَ اِنت۔
آیاں گوشتگ کہ 4 اکتوبر 2025 ءَ بیگواھیں رھشون شبیر بلوچ ءِ پہ آجوئی ءَ آئی کھول ءَ تربت ءَ یک روانکے ءِ کشگ ءُ مراگشے ءِ برجم دارگ ءِ جار جتگ بلوچ وومن پورم کیچ ھنکین ءُ بلوچ یکجھتی کمیٹی کیچ ھنکین شبیر ءِ کھول ءِ جار ءِ پلّہ مرزی ءَ کنت ءُ ما گوں کیچ ءِ مھلوک ءَ لوٹ کن ایں کہ سیما بلوچ ءِ گیش ءَ چہ گیش ھمراہ داری بہ کن اِت ءُ زوراکی ءِ بگیری ءَ یکجاہ بہ بہ اِت۔
